Suliffeqarfinnut
Atorfinnik allagarsiussap suliarinera
Suliffissarsiortunut kajungilersitsinissamut atorfimmut allagarsiussaq suliffeqarfissinnut tunngaviuvoq pingaarutilik, atorfimmik inuttassarsiuinermi oqaaseqatigiit eqqarsaatigilluagaasut, ersarissut naatsullu suliffissarsiortunut orniginarnerulersitsisarlutillu soqutiginarnerulersitsisarput.
Suleqatissamik nutaamik ujaasinermi allagarsiissut piffissaqarfigilluanngikkaanni oqaasertaliussallu eqqarsaatigilluarsimanngikkaanni atorfimmik inuttassarsiuineq sivitsortoorsinnaasarpoq, taamaammat suleqatigisap ulloq suliunnaarfissaa sioqqullugu periarfissaalluartillugu taamatullu suleqatigisap piginnaasai suliffeqarfiup pisariaqartitai annaannginnissai qulakkeerniagassaalluni.
Suliffissarsiortunut arlalinnut soqutiginartuuvoq suliffeqarfik qanoq ittoq iserfigilernerlugu, taamaattumik suliffeqarfik pillugu paasissutissat suliffeqarfiup suliffittut qanoq ittuuneranik ersersitsisut atorfinnik inuttassarsiuilluni allagarsiussami ilanngutissallugit isumassarsiatsialaavoq.
Atorfimmik inuttassarsiuinermi allagarsiussamut atuartussat eqqarsaatigalugit pingaaruteqarportaaq allagarsiussap qulequtaata soqutiginartunngortinnissaa,
sulisussaq tulleq nassaarinissaanut, suna suliffeqarfimmi pisariaqartinnerlugu aamma sulilertussap sulinermi piginnaasassai suunersut eqqarsaaatigilluagassaapput, atorfimmi suliassat naammassineqartussat, sulisorlu qanoq ittoq ujartornerlugu ersarissumik atorfimmut allagarsiussami allassimanissai pingaaruteqarlunittaaq.
Allagarsiussap imarisaa eqqarsaatigalugu inummut toqqaannartumik oqalunnertut nipilimmik imaqartinneqaruni allagarsiussamik atuartumut orniginarnerulersitsisinnaavoq.